I jepet lamtumira e fundit Mulla Rifatit

/2L ONLINE/ – Familjarë, miq, drejtues të institucioneve shoqërore, politike e fetare dhe të afërm të tjerë i kanë dhënë lamtumirën e fundit mulla Rifat Jasharit, i cili u varros sot në Zhegër të Gjilanit, në oborrin e xhamisë së këtij fshati. Ai ndërroi jetë në mëngjesin e sotëm në moshën 98 vjeçare.
Mulla Rifat Jashari ishte një hoxhë përparimtarë dhe atdhetar i devotshëm. Një njeri që gjatë gjithë jetës ishte kultivues i paqes, tolerancën, të respektit ndërnjerzorë si dhe i dijes dhe veçohet për insistimin e tij në shkollimin e popullatës shqiptare , të të rinjve, në veçanti të femrave. Në kohën kur arsimimi i popullatës shqiptare ishte halë në sy e armiqve, mulla Rifati gjente mundësinë që edhe sa kryente predikimet në xhami, t’ua mësonte fshehtas të rinjve shkrim leximin shqip.

Ai shquhej edhe për rolin e tij të madh në pajtesa dhe ngatërresa të ndryshme të bashkëkombësve të tij. Ai ishte njeri me autoritet të lartë dhe kudo që shkonte ishte i mirëpritur.

Kryetari i Komunës së Gjilanit, Lutfi Haziri, i ka dërguar një telegtram ngushëllimi familjes Jashari, pas vdekjes së hoxhës Rifat Jashari. Në telegram thuhet:

“E nderuara familja Jashari, më lejoni t’ju shpreh ngushëllimet më të sinqerta me rastin e largimit nga kjo botë të hoxhës dhe atdhetarit të njohur të Gjilanit, Rifat Jashari.

Hoxhën e nderuar e kam njohur personalisht dhe ruaj kujtime të jashtëzakonshme për këtë njeri të mirë. Ai, gjatë tërë jetës së tij punoi për Fe e Atdhe dhe do të mbahet në mend për sa të jetë jeta si njeriu që e nxiti shkollimin e femrave në një kohë të pakohë.

Vdekja e mulla Rifatit ka lënë boshllëk të madh tek xhemati i tij, brezi i hoxhallarëve, por natyrisht, boshllëku më madh është për familjen dhe farefisin.

Ngushëllime familjes, Bashkësisë Islame dhe kolegëve. Zoti e shpërbleftë!”, thuhet në telegramin e ngushëllimit të kryetarit Haziri, dërguar familjes Jashari. /2L ONLINE/