Hyseni: Shumica e kritereve për liberalizim të vizave tashmë pothuajse janë plotësuar

Ministri i Punëve të Brendshme, Skender Hyseni, priti në takim u.d. Shefin e Zyrës së Këshillit të Evropës në Prishtinë, Andrew Forde. Gjatë këtij takimi u bisedua lidhur me prioritetet e Ministrisë së Punëve të Brendshme në përmbushjen e obligimeve në procesin e liberalizimit të vizave. Gjithashtu, u bisedua për bashkëpunimin mes MPB-së dhe Këshillit të Evropës.

“Shumica e kritereve të dala nga udhërrëfyesi për liberalizim të vizave tashmë pothuajse janë plotësuar. Prandaj, presim që të kemi vlerësim pozitiv. Gjithashtu presim nga Këshilli i Evropës mbështetjen në procesin e aplikimit dhe anëtarësimit të Republikës së Kosovës si anëtare me të drejta të plota”, tha ministri Hyseni.

U.d. Shef i Zyrës së Këshillit të Evropës në Prishtinë, Andrew Forde, shprehi gatishmërinë e tij për fuqizimin e mëtutjemë të bashkëpunimit ndërmjet Këshillit të Evropës dhe MPB-së.

“Ne do të vazhdojmë ta përkrahim dhe asistojmë Kosovën me të gjitha instrumentet që kemi në dispozicion në fusha të ndryshme”, tha z. Forde.

Ministri Hyseni falënderoi u.d. Shef i Zyrës së Këshillit të Evropës në Prishtinë Andrew Forde për gatishmërinë e treguar në bashkëpunimin e mëtutjeshëm.