Hyseni: Kontributi i çmuar i Sherafedin Kadriut në letërsinë shqipe, në trashëgiminë kulturore dhe në edukimin e brezave të rinj do të mbetet i paharruar

“Me pikëllim të thellë mora lajmin për ndarjen nga jeta të studiuesit, poetit dhe veprimtarit të shquar të kulturës, Sherafedin Kadriu. Kontributi i tij i çmuar në letërsinë shqipe, në trashëgiminë kulturore dhe në edukimin e brezave të rinj do të mbetet i paharruar”, ka thënë kreu i Komunës së Gjilanit, Alban Hyseni, në deklaratën ngushëlluese të tij.

I pari i Gjilanit ka thënë se Kadriu ishte një zë i përkushtuar i kulturës dhe një shembull i rrallë i angazhimit intelektual dhe njerëzor.

Në vitet e fundit të jetës, i ndjeri ishte i angazhuar edhe në Qendrën Rajonale për Trashëgimi Kulturore në Gjilan, duke dhënë një kontribut të vyer në ruajtjen dhe promovimin e vlerave tona kulturore.

“Në këto momente të vështira, shpreh ngushëllimet më të sinqerta familjes Kadriu, miqve, bashkëpunëtorëve dhe gjithë komunitetit kulturor. Qoftë i përjetshëm kujtimi për të”, ka thënë kryetari Hyseni.   /2LONLINE/