Hyseni: Bashkë me Haxhiun realizuam një bashkëbisedim të drejtpërdrejtë me qytetarë, ndërmarrës dhe profesionistë…
Kreu i Komunës së Gjilanit, Alban Hyseni ka bërë me dije se kanë mirëpritur sot në Gjilan, Ushtruesen e Detyrës së Presidentes së Republikës së Kosovës, Albulena Haxhiu, ku, siç tha ai: “bashkë realizuam një agjendë intensive dhe mjaft produktive, me qëllim bashkëbisedimin e drejtpërdrejtë me qytetarët, ndërmarrësit dhe profesionistët e komunës tonë”.
“Vizitën e nisëm në Bresalc, ku vizituam fabrikën e qeseve dhe plastikës Pani. Pamë nga afër procesin e prodhimit dhe diskutuam me drejtuesit e biznesit për sfidat e përditshme të ndërmarrësisë lokale, si dhe për format se si institucionet mund të ofrojnë më shumë mbështetje për zhvillimin e mëtutjeshëm ekonomik dhe industrial”, tha Hyseni.
Sipas tij, Më pas, vazhduan me një takim frymëzues me vajzat dhe gratë e komunës së Gjilanit, ku gjatë bashkëbisedimit të hapur, trajtuan çështjet që lidhen me fuqizimin e tyre në shoqëri, rritjen e hapësirave për vendimmarrje dhe rëndësinë e përkrahjes së vazhdueshme institucionale.
“Vizitën e përmbyllëm në një ambient shumë miqësor, me profesoreshat e nderuara të qytetit tonë, me të cilat biseduam për politikat e qeverisjes lokale dhe asaj qendrore në trajnimin e mësimdhënësve dhe ngritjen e kapaciteteve. Faleminderit Kryeparalamentares Haxhiu për vizitën dhe gatishmërinë për të dëgjuar zërin e qytetarëve tanë”, ka thënë Hyseni. /2LONLINE/