Huruglica: Prioriteti ynë, i gjithë procesi të zhvillohet në mënyrë të drejtë, e transparent, trajtim të barabartë për të gjithë aplikuesit

“Pas përmbylljes së afatit të aplikimit në kuadër të projektit “Punë dhe Aftësi për Parandalimin e Migrimit në Kosovë”, në bashkëpunim me organizatën Help in Kosovo, prioriteti ynë është që i gjithë procesi të zhvillohet në mënyrë të drejtë, transparente dhe korrekte, duke garantuar trajtim të barabartë për të gjithë aplikuesit”, ka thënë Haki Huruglica, drejtor i Drejtorisë për Zhvillim Ekonomik, në Komunën e Gjilani.

Vlerësimi i aplikimeve, përzgjedhja e përfituesve dhe monitorimi i zbatimit realizohen në tërësi nga organizata Help, sipas procedurave përkatëse.

“U bëjmë thirrje të gjithë aplikuesve të mos bien pre e premtimeve për përfitimin e grantit përmes favoreve apo ndikimeve tjera të padrejta. Çdo përpjekje për manipulim, ushtrim presioni, ndikim të padrejtë apo ndërhyrje të kundërligjshme në procesin e përzgjedhjes së përfituesve duhet të raportohet në Drejtorinë për Zhvillim Ekonomik të Komunës së Gjilanit. Integriteti i këtij procesi është i panegociueshëm dhe çdo pretendim për ndikim jashtë kritereve zyrtare do të trajtohet me seriozitetin e duhur”, ka thënë Huruglica.

Sipas tij, çdo raportim do të trajtohet me seriozitet dhe, kur ka bazë, do t’u përcillet organeve kompetente. Qëllimi ynë është që përzgjedhja të bëhet vetëm mbi bazën e kritereve, integritetit dhe meritokracisë.

“Na duhet një proces i drejtë, transparencë e plotë dhe zero tolerancë ndaj ndikimeve të kundërligjshme. Integriteti i këtij procesi është përgjegjësi e përbashkët e gjithë neve”, ka thënë drejtori i Drejtorisë për Zhvillim Ekonomik, në Komunën e Gjilani, Haki Huruglica.   /2LONLINE/