Huruglica: Komuna e Gjilanit dhe Help rrisin mbështetjen nga 35 në 65 biznese, me investim total prej 162,500 eurove

Drejtori i Drejtorisë për Zhvillim Ekonomik në Komunën e Gjilanit, Haki Huruglica, ka bërë me dije se sot është nënshkruar Aneksi i Marrëveshjes së Bashkëpunimit ndërmjet Komunës së Gjilanit dhe organizatës Help – Hilfe zur Selbsthilfe, në kuadër të projektit “Punë dhe Aftësi për Parandalimin e Migrimit në Kosovë”, të financuar nga Zyra Federale Gjermane për Migracion dhe Refugjatë (BAMF).

Numri i përfituesve rritet nga 35 në 65 biznese, duke shtuar edhe 30 grante të reja.

Vlera e përgjithshme e investimit arrin në 162,500 euro, me mbështetje mesatare prej 2,500 euro për përfitues, përmes bashkëfinancimit nga Help dhe Komuna e Gjilanit.

“Ky program synon të mbështesë zhvillimin e bizneseve, vetëpunësimin dhe krijimin e mundësive të reja ekonomike. Drejtoria për Zhvillim Ekonomik organizon sesionin informues më 15 tetor 2026, nga ora 10:00 deri në 11:00, në Bibliotekën e Qytetit “Fan S. Noli” në Gjilan.  Ftohen të gjithë përfaqësuesit e bizneseve dhe qytetarët e interesuar të marrin pjesë për t’u informuar rreth kritereve, kushteve dhe mënyrës së aplikimit për përfitimin nga ky program”, ka bërë me dije drejtori i Zhvillimit Ekonomik, Haki Huruglica.  /2LONLINE/