Huruglica: 70 përfitues përkrahen për zhvillimin e bizneseve dhe krijimin e vendeve të reja të punës në Gjilan
“Drejtoria për Zhvillim Ekonomik e Komunës së Gjilanit, në bashkëpunim me organizatën Help – Hilfe zur Selbsthilfe, ka përmbyllur procesin e vlerësimit dhe përzgjedhjes së përfituesve në kuadër të projektit “Punë dhe Aftësi për Parandalimin e Migrimit në Kosovë”, të financuar nga BAMF dhe bashkëfinancuar nga Komuna e Gjilanit”, ka bërë të ditur drejtori i kësaj drejtorie Haki Huruglica.
Sipas tij, nga gjithsej 187 aplikime të pranuara, komisioni vlerësues i organizatës Help ka realizuar vlerësimin e aplikimeve dhe vizitat në terren me 85 aplikantë. Pas përfundimit të procesit, janë përzgjedhur 70 përfitues, 2 aplikantë janë vendosur në listën e pritjes, ndërsa 13 janë klasifikuar si të papërzgjedhur.
Huruglica ka theksuar se i gjithë procesi i vlerësimit dhe përzgjedhjes është udhëhequr nga parimet e transparencës, paanshmërisë dhe barazisë. Çdo aplikim është shqyrtuar me përgjegjësi dhe në përputhje me kriteret e përcaktuara, duke garantuar që përzgjedhja të bëhet mbi bazën e meritës, pa favorizime dhe pa asnjë formë diskriminimi.
“Falënderojmë Drejtoreshën e Organizatës Help për Kosovë, znj. Shqipe Breznica, si dhe komisionin vlerësues, të udhëhequr nga z. Rrezart Shala, për punën, profesionalizmin dhe korrektësinë e treguar gjatë gjithë procesit, si dhe për bashkëpunimin e shkëlqyer. Të gjithë përfituesve, u urojmë shumë suksese, duke shpresuar që kjo mbështetje të jetë një shtysë modeste por e rëndësishme dhe pikënisje për zhvillimin e mëtejmë të bizneseve të tyre, krijimin e mundësive të reja dhe realizimin e synimeve të tyre”, ka thënë Haki Huruglica, drejtor i Drejtorisë për Zhvillim Ekonomik në Komunën e Gjilanit. /2LONLINE/
