Hoxhaj: Nuk i njohim vendimet e Kuvendit, do t’i drejtohemi Gjykatës

Partia Demokratike e Kosovës (PDK), ka bërë të ditur se do t’i drejtohet Gjykatës Kushtetuese për vendimet që janë marrë sot në Kuvendin e Kosovës, kur u bë konstituimi dhe u zgjedh kryetar i Kuvendit, Isa Mustafa nga LDK.

Këto deklarata, janë thënë nga zyrtarë të PDK-së, në momentet kur janë dalë nga mbledhja emergjente e kryesisë së PDK-së.

Nënkryetari i PDK-së Enver Hoxhaj, ka deklaruar për media se PDK e ka dënuar ashpër ngjarjen e sotme.

Hoxhaj ka thënë se sot, u tentua që të uzurpohet institucioni më i lartë i shtetit, Kuvendi i Kosovës.

“Brenda këtyre ditëve, për të mos thënë brenda këtyre orëve duke e konsideruar si krejtësisht të kundërligjshme dhe jo valide vendimet e marra në seancën e sotme, PDK do t’i drejtohet Gjykatës Kushtetuese të Republikës së Kosovës në lidhje me zhvillimet e sotme për të kërkuar rivënien e legalitetit dhe legjitimitetit në këtë institucion”, ka thënë Hoxhaj.