Hoxhaj mirënjohje Ganës për njohjen e Kosovës
Ministri i Punëve të Jashtme i Republikës së Kosovës, Enver Hoxhaj, ka pritur sot në takim ambasadorin e Ganës në Turqi, jo-rezident për Kosovën, Alhaji Ibrahim Abass, i cili i ka dorëzuar kopjet e letrave kredenciale.
Kjo është vizita e parë në Kosovë e ambasadorit të Ganës, pas vendosjes së marrëdhënieve diplomatike në tetor të vitit 2012.
Ministri Hoxhaj e njoftoi ambasadorin për progresin e madh që është arritur në Kosovë në të gjitha fushat, duke e falënderuar Ganën për njohjen e Kosovës, dhe çmuar lartë vullnetin e këtij shteti për të bashkëpunuar në shumë fusha.
“Përtej njohjes dhe vendosjes së relacioneve formale, Republika e Kosovës është e interesuar që të kemi një dimension të gjerë bashkëpunimi në ekonomi, tregti, kulturë dhe shkëmbime ndërmjet dy shoqërive tona”, tha ministri Hoxhaj.
Ambasadori jo-rezident i Ganës në Kosovë, Alhaji Ibrahim Abass, ka vlerësuar lartë progresin në Kosovë, duke shprehur përkushtimin e tij për të ndërtuar relacione të fuqishme ndërmjet Ganës dhe Kosovës.
Ambasadori Abass i përcolli ministrit Hoxhaj ftesën për të zhvilluar një vizitë pune në kryeqytetin e Ganës, Accra.