Hoxhaj dhe Pack, akuzat e Martyt të paqëndrueshme

Ministri i Jashtëm i Kosovës, Enver Hoxhaj dhe ish-Eurodeputetja gjermane, Doris Pack kanë theksuar se akuzat e Dick Martyt janë “ jobindëse”.

Në një deklaratë për Euobserver, Ministri Hoxhaj, ka theksuar se ngërçi aktual nuk do të ndikojë në gjykatën e posaçme, pasi që ajo do të jetë vetëm një nga prioritetet për Qeverinë e ardhshme.

Hoxhaj po ashtu ka bërë të ditur se Prishtina është në bisedime me qeverinë holandeze dhe Brukselin për marrëveshjet bilaterale që kërkohen për të ecur përpara.

Sipas tij, arritja e koalicionit qeveritar është çështje javësh.

Hoxhaj po ashtu ka hedhur poshtë pohimet e disa analistëve për gjoja fajësi dhe krime nga UÇK duke i quajtur teori të ndryshme të konspiracionit dhe duke theksuar se autoritetet e Kosovës nuk kanë asgjë për të fshehur dhe kanë vullnet të madh politik për të quar përpara gjykatën dhe për ta pastruar emrin e UÇK-së.

“Kosova ka luftuar për liri. Që kur akuzat e Martyt janë bërë publike ato kanë dëmtuar imazhin e Kosovës dhe ne jemi shumë të vendosur për të mbyllur këtë kapitull”, shprehet Hoxhaj.

Në artikullin e Euobserver po ashtu citohet politikania gjermane Doris Pack, ish-Eurodeputete e cila ka punuar me Kosovën që nga shpërbërja e ish-Jugosllavisë, e cila është pajtuar me Hoxhajn lidhur me paqëndrueshmërinë e akuzave të Martyt.

Ajo i ka thënë Euobserver se akuzat e Martyt janë “jo bindëse”.