Zëvendësministri i Kulturës, Rinisë dhe Sportit, Rexhep Hoti i shoqëruar edhe nga drejtori i Rinisë në MKRS, Xhevat Bajrami mori sot pjesë në konferencën “Gratë e reja dhe roli i tyre në sektorin e sigurisë” që u mbajt në Reçan të Prizrenit.
Konferenca e organizuar nga OJQ-ja “Barazia” është aktiviteti i fundit në zbatimin e projektit “Gratë e reja dhe roli i tyre në sektorin e sigurisë”, projekt ky ekskluzivisht për gratë e reja të komunitetit boshnjak, dhe rolin e tyre në sigurinë e përgjithshme të tyre.
Në konferencë ishin të pranishëm përfaqësues të organizatës, Komunës së Prizrenit, përfaqësues institucional si dhe të rinj të komunitetit boshnjak.
Gjatë konferencës u bisedua për sigurinë e personelit, veçmas të gjinisë femërore, ku u diskutua edhe për rolin e vetë grave të reja dhe kontributin për sigurinë e përgjithshme.
Zëvendësministri Hoti tha se siguria është një koncept kompleks që lidhet jo vetëm me të drejtat e njeriut, ligjin dhe Kushtetutën në fuqi, por edhe me përgjegjësinë e vetë komunitetit.
Sipas Hotit, boshnjakët në Kosovë janë komunitet shtetformues dhe ndërtues, që gëzojnë të drejta kudo që ndodhen.
Zëvendësministri tha se boshnjakët në Kosovë kanë kontribuar edhe për lirinë e vendit.
Ai ofroi gatishmërinë e MKRS-së që nëpërmjet projekteve konkrete, të ofrojë ndihmë për komunitetin boshnjak në Kosovë.