Homazhe në Smirë për të nderuar jetën dhe veprën e Ramadan Beratit

Në përvjetorin e 27-të të vrasjes së Ramadan Berati nga forcat serbe, në fshatin Smirë janë mbajtur homazhe për të nderuar jetën dhe veprën e tij.

Në këtë aktivitet përkujtimor morën pjesë përfaqësues institucionalë, familjarë dhe bashkëqytetarë, të cilët me respekt kujtuan sakrificën e Beratit. I pranishëm ishte edhe kryetari i Komunës së Vitisë, Sokol Haliti, së bashku me bashkëpunëtorët e tij, si dhe përfaqësues të OVL e UÇK-së – dega në Viti.

Me këtë rast, pjesëmarrësit vendosën kurora lulesh pranë varrit të të ndjerit, duke shprehur mirënjohje dhe respekt për kontributin dhe sakrificën e tij. Homazhet u zhvilluan në një atmosferë të qetë dhe dinjitoze, duke rikujtuar rëndësinë e ruajtjes së kujtesës historike dhe nderimit të figurave që dhanë jetën për liri. /2LONLINE/