Lidhja e Historianëve të Kosovës “Ali Hadri” dega në Deçan, ka reaguar ndaj deklaratës së ministrit për Kthim dhe Komunitete Aleksandër Jabllanoviç.
Historianët e Deçanit kërkojnë nga kryeministri i Kosovës Isa Mustafa, që të shkarkoj menjëherë nga detyra ministrin Jabllanoviç.
“Kjo të jetë një herë e përgjithmonë shembull për ministrat e etnisë serbe në Qeverinë e Kosovës, që nuk duhet të fyhet e aq me pak të fyhen nënat të cilat i kanë dhënë kësaj toke, bijtë dhe bijat me të mirë të cilët u flijuan për lirinë, çlirimin dhe pavarësinë e Kosovës”, thuhet në komunikatën e kësaj Lidhje dërguar mediave.
Historianët e “Ali Hadri” i rikujtojnë kryeministrit Mustafa, se ishte edhe Dalibor Jevtiç ish- ministër i Ministrisë për Komunitete dhe Kthime në Qeverinë e Kosovës ai, i cili i kishte fyer edhe shqiptarët ne Mushtisht të Suharekës më 29 gusht të vitit 2014.
Sipas historianëve të Deçanit ishin bashkëkombësit e Jabllanoviçit ata të cilët kanë kryer krime dhe kanë bërë gjenocid kundër shqiptarëve. Lidhja e historianëve në Deçan, përkrah protestën e sotme në Gjakovë dhe i bën thirrje të gjithë shqiptarëve anë e kënd Kosovës që të solidarizohen me nënat dhe familjet gjakovare.