Hidromorava: Ndaloni keqpërdorimin e ujit të pijshëm

Hidromorava: Ndaloni keqpërdorimin e ujit të pijshëm

Të nderuar qytetarë,

Gjatë inspektimeve të fundit në zonën tonë të shërbimit, ekipet e KRU Hidromorava kanë evidentuar raste të keqpërdorimit të ujit të pijshëm, si larja e rrugëve, automjeteve, ujitja e kopshteve dhe përdorime të tjera të paautorizuara, në një periudhë kur kërkesa për ujë është jashtëzakonisht e lartë.

Ju rikujtojmë se çdo përdorim i ujit të pijshëm jashtë nevojave themelore të konsumit njerëzor, si dhe çdo lidhje ilegale në rrjetin e ujësjellësit, përbën shkelje të rregulloreve në fuqi dhe cenon furnizimin e rregullt me ujë për të gjithë qytetarët.

KRU Hidromorava do të intensifikojë kontrollet në terren, ndërsa ndaj çdo keqpërdoruesi do të ndërmerren masa të rrepta, përfshirë edhe shkyçjen e menjëhershme nga rrjeti pa paralajmërim.

Ju rikujtojmë se Autoriteti Rregullator për Shërbimet e Ujit (ARRU), më 01.06.2026, ka nxjerrë Vendimin për ndërmarrjen e masave të përkohshme për ndalimin e keqpërdorimit të ujit të pijshëm gjatë sezonit veror, me të cilin ndalohet përdorimi i ujit të pijshëm nga sistemi publik i furnizimit për:

• Larjen e rrugëve, trotuareve dhe sipërfaqeve të tjera publike ose private;

• Larjen e automjeteve;

• Ujitjen e kopshteve, livadheve dhe tokave bujqësore;

• Mbushjen e pishinave;

• Çdo përdorim tjetër që nuk lidhet me nevojat themelore të konsumit njerëzor.

Ruajeni ujin – është përgjegjësi e secilit prej nesh. Duke kursyer ujin sot, sigurojmë furnizim të qëndrueshëm për të gjithë nesër.

KRU Hidromorava – Gjilan