Haziri: VV Gjilanin e shndërroi në shitore të thyer, ne e dëshmuam konstruktivitetin sepse e duam qytetin më shumë se partinë

Kryetari i Degës së Lidhjes Demokratike të Kosovës (LDK), njëherësh nënkryetar në nivel qendror, Lutfi Haziri, në konferencën për media të mbrëmjes, ka paraqitur qëndrimet e partisë përkitazi me zhvillimet e fundit në Kuvendin Komunal.

Ai tha se LDK në Gjilan ka filluar me procesin e analizës së zgjedhjeve të 9 shkurtit, duke i falënderuar strukturat e partisë, komisionerët e vëzhguesit, duke qenë se jemi në fazën e tretë të procesit zgjedhor, ku pritet certifikimi i tyre.

“Jemi falënderues ndaj të gjithë atyre që kanë punuar pa u kursyer, në mënyrë që LDK ta kalojë këtë process, duke qenë shembulli më i mirë i sjelljes politike e ofrimit të programit më të mirë”.

“Po ashtu, më 4 mars ne shënojmë 35-vjetorin e themelimit të Degës së LDK-së në Gjilan, me respekt ndaj të gjithë veprimtarëve, aktivistëve e funksionarëve, në veçanti përulemi ndaj atyre burra e grave të cilët nuk janë sot në mesin tonë”, ka thënë Haziri.

Ai bëri me dije se këtë përvjetor jubilar do ta shënojnë në vendin ku është themeluar LDK e Gjilanit, në Përlepnicë, në sallën “Zija Shemsiu”, në ora 14:00.

“Ndërsa, në vigjilje të muajit të shenjtë të Ramazanit, grupi i këshilltarëve të LDK-së në Kuvendit Komunal dëshmoi konstruktivitetin e madh, duke miratuar buxhetin për qytetarët, punëtorët shëndetësorë e arsimtarët dhe të gjitha kategoritë”, thotë Haziri.

Ai shtoi se LDK dhe partitë tjera opozitare janë sjellur si grupe politike në interes të qytetarëve e jo me agjenda partiake, duke treguar konstruktivitetin e madh, si dëshmi se ne e duam qytetin më shumë se partinë.

“I vetmi që është sjellur si me agjenda të partisë është i pari i ekzekutivit z. Hyseni, i cili për këto katër vite e shndërroi Gjilanin në një shitore të thyer, duke e stërkequr çdo sektor, për ta dëshmuar për fat të keq që ky mandat ka qenë i humbur për qytetarët”, ka thënë i pari i LDK-së së Gjilanit, Lutfi Haziri.

Ai shtoi se LDK kërkon nga ekzekutivi, të cilin do ta mbikëqyrë vazhdimisht, që buxheti të implementohet në tërësi e jo në mënyrë selektive.  /2LONLINE/