Haziri u jep dy javë afat borxhlinjve të komunës

/2L ONLINE/ – Vetëm dy javë afat i kanë ata që i kanë borxh komunës, për ta shlyer atë, se pastaj mund të nisin procedurat tjera, duke përfshirë këtu edhe përmbaruesit, policin ëe gjykatat, sepse komuna është e vendosur t’i inkasojë mjetet e saja. Kështu ka bërë të ditur kreu i Komunës së Gjilanit Lutfi Haziri. Ai ka bërë të ditur se këto borxhe tejkalojnë 8 milion euro dhe se ka kërkuar nga të gjithë operatorët, organizmat tjerë, qytetarët, të gjithë ata që i kanë obligimet e pakryera, duke përfshirë periudhën që nga viti 2009 e këndej, ta bëjnë atë brenda kësaj periudhe dy javore, në të kundërtën komuna do t’i ndërmerr hapat tjerë në mbledhjen e këtyre borxheve.

Ai ka bërë të ditur se nga sot kemi vendimin ekzekutiv për mbledhjen e këtyre borxheve që janë nga tatimi në pronë, taksat tjera komunale, nga lejet urbanistike e obligime tjera komunale… dhe se nëse borxhlinjtë nuk duan të kenë probleme me llogarit e tyre bankare, që mund t’u bllokohen shkaku i borxheve, duhet të reagojnë dhe të nisin t’i shlyejnë obligimet që i kanë ndaj komunës.

Ai ka përmendur me këtë rast edhe kyçjen e përmbaruesve, policisë e gjykatave, në këtë proces, nëse nuk ka reflektim në këtë thirrje të tij që borxhlinjtë t’i kryejnë borxhet që i kanë ndaj komunës. /2L ONLINE/