Haziri takon ministrin Berisha për kampusin universitar

Kryetari i Komunës së Gjilanit, Lutfi Haziri, në takimin e zhvilluar me ministrin e Forcës së Sigurisë së Kosovës, Rrustem Berisha, e ka uruar për sukseset në transformimin e FSK’së në Ushtri të Kosovës.

“Uroj për transformimin e FSK’së në Ushtri. Besoj shumë që në proces do të arrihet të ndërtohet struktura e sigurisë që Kosovës ia jep atributin e Forcave të Armatosura. Ky hap i madh e shkurton ndërtimin e Forcave të Armatosura të Republikës”, ka thënë Haziri në takimin e zhvilluar në MFSK.

Gjatë këtij takimi është diskutuar edhe për komisionin e përbashkët për kampusin e Universitetit Publik “Kadri Zeka”, pasi në lokacionin aktual të Brigadës së Reagimit të Shpejtë të FSK parashihet që të ndërtohet kampusi në hapësirën prej 7.2 hektarëve, njofton Komuna e Gjilanit me anë të një kumtese për media.

Ministri i MFSK’së, Rrustem Berisha, e ka falënderuar kryetarin Haziri për vizitën, duke shfaqur gatishmërinë e bashkëpunimit sa i përket çështjes së kampusit dhe në fushat tjera në shërbim të qytetarëve.