(2L ONLINE) – Në kuadër të vizitave të institucioneve në Komunën e Gjilanit, kryetari i Komunës së Gjilanit Lutfi Haziri, i shoqëruar nga shefi i Kabinetit Arbër Ismajli, ka vizituar të enjten Shtëpinë e Shëndetit Mendor.
Drejtori i kësaj qendre, dr. Afrim Cana, e ka falënderuar kryetarin Haziri për vizitën e sotme, ndërsa e njoftoi me punët, sfidat dhe progresin e arritur në këtë qendër, duke e vlerësuar si më të suksesshmen në nivel Kosove.
“Jemi e vetmja qendër në nivel Kosove që kemi arritur ta kemi kuadrin profesional, i cili kërkohet sipas hierarkisë. Në një formë përpjekjet janë që individët të cilët i trajtojmë këtu me qenë të pavarur dhe të pranuar në shoqëri. Kujdesemi për terapinë, aspektin social etj. Kemi edhe nevoja tjera që të funksionojmë suksesshëm”, tha drejtori i Shtëpisë së Shëndetit Mendor, Afrim Cana.
Nga ana e tij, kryetari i Komunës së Gjilanit Lutfi Haziri u shpreh i lumtur me progresin e arritur të kësaj qendre, duke iu konfirmuar mbështetjen maksimale të Komunës për t’u dalë në ndihmë me të gjitha kapacitetet komunale.
Haziri tha se si kryetar i Komunës do të kujdeset për t’u dalë në ndihmë të gjitha institucioneve dhe kategorive shoqërore në Komunën e Gjilanit.
Ndryshe, drejtori i QSHM Afrim Cana tha se Lutfi Haziri është kryetari i parë i Gjilanit që po e viziton këtë Qendër që nga viti 2005. /2L ONLINE/