Haziri: Propozimi ynë për Qeverinë e Unitetit është zgjidhja më e mirë kalimtare për të gjithë

Për herë të 29-të ka dështuar përpjekja për konstituimin e Kuvendit të Republikës së Kosovës, e deputeti i LDK-së, njëherësh nënkryetar i këtij subjekti politik, Lutfi Haziri ka thënë se propozimi i këtij subjekti për Qeverinë e Unitetit është zgjidhja më e mirë kalimtare për të gjithë

“Sot duhet të reflektojmë më shumë se kurrë. Koha e fundit që parlamentarizmi i Kosovës të mos lejojë ngulfatjen e shtetit nga një parti apo edhe nga një lider. Me dialog aktiv, politik e parlamentar, duhet të përballohet agjenda politike në interesin e qytetarëve të Republikës”, ka thënë Haziri.

Sipas tij, regjioni i Ballkanit Perëndimor po ecën para e bota po ndryshon çdo ditë, ndërkaq Kosova në marrëdhënie të kushtëzuara me perëndimin, që i bie në marrëdhënie të kushtëzuara me aspiratën e saj.

“Kemi ardhur në pozitë që t’i gëzohemi largimit gradual të kushtëzimeve politike e financiare të BE-së”, ka thënë tutje Haziri.

Në anën tjetër, sipas tij, sektorin privat e kanë kapur për fyti, me politika të rritjes së energjisë elektrike dhe tatimit të pronës.

“Mendoni përtej vetes, përtej partisë e për Republikën. Sot është dita e reflektimit sepse 26 vite më parë, Kosova e fitoi luftën me ndihmën e miqve të saj, për ta përkufizuar më së miri thënien lapidare të presidentit Rugova se “shtëpia nuk mbahet pa miq”.Propozimi ynë për Qeverinë e Unitetit është zgjidhja më e mirë kalimtare për të gjithë. Republika, mbi te gjitha”, ka thënë Lutfi Haziri.  /2LONLINE/