Haziri përgëzon zjarrfikësit për renovimin e objektit të tyre me vetiniciativë

(2L ONLINE) – Iniciativa e stafit të zjarrfikësve e nisur javë më parë për renovimin e objektit të Shërbimit të Zjarrfikësve dhe Shpëtimit, tashmë ka përfunduar.

Kryetari i Gjilanit, Lutfi Haziri, i shoqëruar nga drejtori për Mbrojtje dhe Shpëtim Halit Rexhepi, ka parë nga afër përfundimin e punëve vullnetare të zjarrfikësve, duke i komplimentuar ata për punën e mirë që e kanë bërë.

“Sot pashë këtu një punë të madhe që keni bërë ju stafi i zjarrfikësve me vetiniciativë. Ky është shembulli më i mirë dhe ju përgëzoj për këtë aksion, meqë është punë vullnetare dhe nuk ka implikime buxhetore. I falënderoj edhe kompanitë gjilanase që kanë kontribuuar në formë të donacioneve për renovimin e këtij objekti dhe në këtë mënyrë e keni më të lehtë veprimtarinë tuaj. Komuna e Gjilanit do t’ju përkrah në mënyrë të vazhdueshme për t’ua lehtësuar punët”, ka thënë kryetari Haziri.

Në këtë objekt është rregulluar dyshemeja, muret anësore, kuzhina e pjesë të tjera.

Ndryshe, ky nuk është aksioni i vetëm vullnetar i stafit të zjarrfikësve. Muaj më parë, po me iniciativë të stafit të zjarrfikësve, janë rregulluar shkallët para hyrjes së këtij objekti. /2lonline/