Haziri: Partia e parë po e kultivon parimin ‘sa më keq, aq më mirë kundër Republikës’, parimet e LDK-së për ta ruajtur këtë Republikë janë të shenjta!

Deputeti i LDK-së, Lutfi Haziri ka thënë se partia e parë po e kultivon parimin ‘sa më keq, aq më mirë kundër Republikës’, parimet e LDK-së për ta ruajtur këtë Republikë janë të shenjta!

“LDK është gardiane dhe kujdestare e Republikës, duke vazhduar që ta ndërtojë vlerën e Republikës, të njerëzve të vendit, në parimin e bashkimit në dallime. Themeltari i késaj Republike, Ibrahim Rugova, e ka permendur në ditët e para të çlirimit unitetin plural. Sot jemi këtu për të dëshmuar që sovraniteti është bërë në këtë sallë plenare, këtu është ndërtuar dhe ruhet çdo ditë Republika e Kosovës”, ka thënë Haziri.

Ai ka rikujtuar se rezistenca politike që përfaqësohet nga LDK, e cila e ka bashkuar popullin për qëllim të madh, dhe rezistenca e kryengritja ushtarake që ka ndodhur përmes UÇK-së, mbi parimin ‘sa më keq, aq më mirë’, është mobilizuar populli për të mirë, dhe në një proces prej më pak së dhjetë vjetësh, kemi arritur që ta përmbyllim lirinë e Kosovës.

“Por, 26 vjet më vonë, parimi ‘sa më keq, aq më mirë kundër Republikës’, po vazhdon të jetë parim që partia e parë po e kultivon, me gjuhën e urrejtjes, mosdurimit dhe me të gjitha mjetet politike për një qëllim krejt tjetër politik”, ka thënë tutje në fjalën e tij, deputeti Haziri.

Sipas tij, mos-shfrytëzimi i të drejtës nga partia e parë për ta zbatuar suksesin e vetë të 9 shkurtit, dëshmon qartë për një problem serioz. Na anën tjetër, partia e parë po shkakton një gjaderdhje të madhe financiare përmes skandaleve të jashtëzakonshme e keqpërdorimve, prej rrymës e deri te subvencionet, për përfitime për familjarët e tyre e për pasurim të individëve.

Haziri thotë se ata që ikin, ata që fshihen, ata që nuk duan të bashkëpunojnë, ata që nuk e duan një shtet funksional, ata që nuk duan që Republika të udhëhiqet mbi parimin dhe mekanizmat e Kushtetutës, kanë diçka për të fshehur. Ata mund ta udhëheqin partinë e tyre në këtë formë, por nuk mund ta udhëheqin Republikën mbi këtë parim.

“Ne duhet të dalim nga ky qark i mbyllur dhe ta nxjerrim Republikën me shpresë të re e me besim të ri. E vetmja rrugë për këtë është rruga kushtetuese. LDK nuk i beson marrëdhënieve të kushtëzuara, por marrëdhënieve në mirëbesim. Parimet tona për ta ruajtur këtë Republikë, janë të shenjta”, thotë Lutfi Haziri, deputet i LDK-së.  /2LONLINE/