Haziri merr detyrën e kryetarit

(2LONLINE) –  Kryetari i ri i komunës së Gjilanit  Lutfi Haziri dhe ish kryetari i komunës Qemajl Mustafa kanë shtrënguar duart në aktin formal të dorëzim pranim të detyrës së kryetarit të komunës. Me këtë rast , ish kryetari Mustafa ka thënë se ky akt shënon përfundimin e një mandati dhe fillimin e një mandati të ri. Mustafa ka thënë se kjo është demokracia  dhe se  vlerë e saj janë rotacionet, ndërrimet e rifreskimet në sferën politike e shoqërore.

Ai i ka uruar Hazirit punë të suksesshme në mandatin e tij duke u ofruar bashkëpunues, e duke thënë se eksperienca e tij dhe e stafit të tij, që ishte përgjatë këtij mandati që po përfundon sot,  është e gatshme nëse kryetari i ri ka nevojë për këtë.

Mustafa ka thënë  do të jenë  të organizuar si opozitë, plotësisht analizuese, konstruktive dhe kontributdhënëse për të mirën e Gjilanit dhe qytetarëve të saj.

Nga ana e tij, kryetari i ri i Gjilanit, Lutfi Haziri ka  falënderuar ish kryetarin e komunës dhe ekipin e tij për angazhimet që i kanë pas përgjatë mandatit të tyre, ndërsa ka thënë se  parimi i kontinuitetit është kulturë politike e tij andaj kjo edhe tani do të vlejë. Do të vazhdojnë pjesa më e madhe e projekteve të kryhen, ndërsa për ato që ka nevojë do të ketë revidim.

Haziri  tha se është për bashkëpunim sepse Gjilanit i nevojitet uniteti politik  pasi në nivel të përgjithshëm ka qenë e diskriminua kjo komunë, sidomos kur janë në pyetje investimet kapitale.

Ai  tha se shërbyesit civil dhe zyrtarë të tjerë  nuk duhet ta shohin këtë ditë si një ditë e ndryshimit të madh për ta, por si ndërrim që solli forca e demokracisë  dhe se duhet të vazhdohet të punohet së bashku.

Përndryshe , në agjendën e kryetarit të ri për sot janë paraparë takime të shumta por pritet edhe emërimi i  ushtruesve të postit të drejtorëve në Drejtorive Komunale. / 2lonline/