Haziri mbështet projektet për ruajtjen e trashëgimisë kulturore dhe fetare në Gjilan

/2L ONLINE/ – Kryetari i Komunës së Gjilanit Lutfi Haziri, ka pritur në një takim pune Kancelarin ipeshkvor, të Ipeshkvisë së Kosovës, Dr. Don Shan Zefi, me të cilin kanë biseduar për mbështetjen e projektit në investimet që do të bëhen në kishën e “Shën Anës”, në fshatin Dunav, por edhe për projekte të cilat kanë qëllim trashëgimin kulturore e fetare dhe harmonizimin e shënimit të datave të rëndësishme kalendarike në Gjilan.

Me këtë rast kryetari Haziri, ka thënë se me kancelarin ipeshkvor, kanë biseduar për bashkëpunimin e ndërsjellë dhe harmonizimin e aktiviteteve për trashëgimin kulturore dhe fetare në Komunën e Gjilanit.

“Kemi biseduar përgjithësisht për jetën kulturore dhe fetare në Komunën e Gjilanit. Jemi të përkushtuar për koordinimin tonë të përbashkët dhe aktiv në organizime të ndryshme për të mirën e vlerave tona historike, fetare, kulturore, shoqërore dhe kombëtare që i kemi në Gjilan. Do të jemi pjesë e mbështetjes në përkujdesjen që është ndërmarrë për kishën e “Shën Anës”, por edhe për projekte të tjera të kësaj natyre në ruajtjen e vlerave kulturore të trashëgimisë historike dhe fetare në vendin tonë”, tha ndër të tjerash kryetari Haziri, duke shtuar se bashkëpunimi me Kishën Katolike do të jetë edhe sa i përket shënimit të datave të rëndësishme kalendarike.

Komuna e Gjilanit ka mbajtur takime të shumta me udhëheqësit e të gjitha komuniteteve fetare për të promovuar vlerat dhe dallimet që janë në mesin e qytetarëve tanë, duke insistuar ruajtjen dhe restaurimin e këtyre vlerave.

Për ndryshe, Gjilani tashmë është vlerësuar nga shumë organizata si qytet shembull i kultivimit të tolerancës ndërfetare dhe ndëretnike. /2L ONLINE/