Haziri kujton martirët e Lladovës, në 21 vjetorin e vrasjes mizore

Kryetari i Komunës së Gjilanit, Lutfi Haziri, në 21 vjetorin e masakrës që ndodhi në fshatin Lladovë, edhe në këto momente të pandemisë globale, ka kujtuar sakrificën që banorët ë këtij fshati kanë kaluar duke respektuar deri në gjunjëzim veprën për të rënët nga kjo masakër në vitin 1999.

“Jemi duke kaluar shumicën e kohës në organizim maksimal për parandalimin e pandemisë Covid-19, mirëpo asesi nuk mundemi dhe nuk guxojmë të harrojmë sakrificën që banorët e Lladovës dhe Karadakut kanë dhënë në luftën për liri. Aty është derdhur gjak që sot të jemi të lirë. Ai gjak është i njomë edhe sot dhe gjithmonë sa të jetë kjo jetë, sepse ata ranë në luftën për liri dhe të tillë do të mbeten vazhdimisht. Ata janë themeli I lirisë dhe gjunjëzohemi para veprës së tyre”, ka thënë kryetari Haziri.

“Ky fshat, por edhe Gjilani dhe e gjithë Anamorava, gjithmonë do ta mbajnë në mend këtë ditë të tmerrit që ndodhi këtu. Rrugët e këtij fshati dhe të kësaj ane, janë rrugët e lirisë për çka u sakrifikuan martirët e Lladovës”, tha ndër të tjerash kryetari, Lutfi Haziri.

Përndryshe, nga regjimi serb, në Lladovë u vranë mizorisht, Beqir Mahmuti (1953), Zijadin Mahmutit (1960), Daut Mahmuti (1963), Hevzi Ajeti (1970), Ganimete Ajeti (1977) dhe Ahmetali Ajeti (1960), ky i fundit i vrarë dhe i zhdukur. Po ashtu, në Gjilan është vrarë edhe Xhemail Ymeri nga Lladova, kurse i plagosur rëndë kishte mbetur Mefail Ajeti.