Haziri kritikon qeverinë qendrore se po e lë anash Gjilanin në investime
Kryetari i Degës së Lidhjes Demokratike të Kosovës (LDK) në Gjilan, Lutfi Haziri, ka bërë të ditur se ka zhvilluar një takim me strukturat e degës, me fokus riorganizimin dhe mobilizimin e partisë në këtë komunë.
Haziri tha se takimi ka përfshirë strukturat e nëndegëve, forumet dhe komisionet sektoriale, duke theksuar se ky proces po zhvillohet në frymën e deklaratës së Kuvendit të 31 janarit.
“Zhvilluam takim me strukturat e Degës së LDK-së në Gjilan, me qëllim të riorganizimit, ristrukturimit dhe mobilizimit, përfshirë nëndegët, forumet e komisionet sektoriale, në frymën e deklaratës së Kuvendit së 31 janarit”, ka deklaruar Haziri.
Sipas tij, LDK-ja është më e bashkuar se asnjëherë më parë dhe se po punohet për zgjerimin e mbështetjes politike.
“LDK është më unike se kurrë dhe po punojmë në vazhdimësi për bashkimin e qendrës së djathtë dhe bashkimin me qytetarët për të mbrojtur vlerat e demokracisë”, është shprehur ai.
Sipas Hazirit, parimi i meritës, uniteti i brendshëm, hapja ndaj të rinjve dhe përfaqësimi qytetar janë elemente kyçe për forcimin e partisë.
Në deklaratën e tij, ai ka kritikuar edhe qeverinë qendrore për mungesë investimesh në Gjilan.
“Është shqetësuese se Gjilani, si qendra më e madhe në Anamoravë, vazhdon të përjashtohet nga kujdesi i qeverisë qendrore në investime”, ka thënë Haziri.
Ai shtoi se, vetëm me rikthimin e LDK-së në udhëheqjen e qeverisë qendrore do të ndodhë edhe rikthimi i kujdesit për Gjilanin në investime komunitare. /2LONLINE/