Haziri: Gjendja nën kontroll dhe rrugët të kalueshme pas reshjeve të shiut në komunën e Vitisë

“Pas reshjeve të pandërprera të shiut gjatë natës, gjendja në Komunën e Vitisë paraqitet stabile. Aktualisht, të gjitha rrugët janë të kalueshme, megjithatë kërkohet kujdes i shtuar nga pjesëmarrësit në komunikacion, pasi uji ka depërtuar në disa segmente rrugore, veçanërisht në fshatin Ramnishtë dhe në rrugën Skifteraj–Radivojc”, thonë drejtuesit e Drejtorisë për Shërbime Publike dhe Emergjencë në Viti.

U.d. i Drejtorisë për Shërbime Publike dhe Emergjencë, Naser Haziri, ka bërë të ditur se Njësia e Zjarrfikësve ndodhet në terren dhe, në bashkëpunim me stafin e kësaj drejtorie, po intervenon vazhdimisht për ta mbajtur situatën nën kontroll dhe për të parandaluar përkeqësimin e gjendjes.

Sipas Hazirit, është intervenuar edhe në rrugën Viti–Letnicë, ku për shkak të reshjeve kishte ardhur deri te shembja e dheut. Pas ndërhyrjes së shpejtë, rruga për momentin është e qarkullueshme.

Nga autoritetet komunale u bëhet thirrje qytetarëve të tregojnë kujdes të shtuar gjatë lëvizjes, veçanërisht në zonat ku ka prani të ujit në rrugë, ndërsa ekipet kompetente mbeten në gatishmëri për çdo nevojë eventuale. /2LONLINE/