Haradinaj: Rekomandimi i Komisionit Evropian për lëvizje të lirë është pozitiv
Kryeministri i Republikës së Kosovës, Ramush Haradinaj, i cili ndodhet në Bruksel, ka shkruar në profilin e tij zyrtar në facebook, se Kosova mori lajmin e shumëpritur për hapjen e rrugës drejt lëvizjes së lirë dhe përafrimit me familjen e madhe europiane!
Kosova mori lajmin e shumëpritur për hapjen e rrugës drejt lëvizjes së lirë dhe përafrimit me familjen e madhe europiane!
Populli i Kosovës me shumë arsye i gëzohet sot rekomandimit pozitiv të Komisionit Evropian për lëvizje të lirë në vendet e BE-së, duke u vlerësuar i barabartë me të gjithë qytetarët tjerë të rajonit dhe ata evropianë.
Me shumë përkushtim dhe vizion Qeveria që unë drejtoj, përgjatë tërë këtyre muajve, ka punuar pa u kursyer, në përmbushjen e kritereve të fundit të BE-së.
Duke qenë të vetëdijshëm për sfidat, do ta intensifikojmë luftën kundër korrupsionit dhe krimit të organizuar dhe fuqizimin e vazhdueshëm të sundimit të ligjit, me bindjen se Parlamenti dhe Këshilli Evropian do të përfillin rekomandimin e Komisionit dhe qytetarët kosovarë do të lëvizin pa viza.
Liberalizimi për Kosovën do të diskutohet deri në fund të gushtit në Parlamentin Evropian, kurse i tërë procesi pritet të përmbyllet deri në fund të vitit.
RH