Hapja e deponisë sanitare në Velekincë për qytetarët, një hap që duhet mirëpritur në Gjilan

Shkruan: Bashkim Isufi

Hapja e deponisë sanitare në Velekincë për pranimin e mbeturinave nga qytetarët paraqet një hap të rëndësishëm në ndryshimin e qasjes ndaj menaxhimit të mbeturinave.

Edhe pse ditëve të fundit janë shfaqur reagime të ndryshme lidhur me hapjen e deponisë sanitare në Velekincë për pranimin e mbeturinave nga qytetarët, është e rëndësishme të theksohet se kjo paraqet një qasje të re në menaxhimin e mbeturinave, e cila synon krijimin e një sistemi më të organizuar, më të kontrolluar dhe më të përgjegjshëm.

Një nga sfidat e vazhdueshme në Komunën e Gjilanit ka qenë krijimi i deponive ilegale, veçanërisht në afërsi të deponisë sanitare në fshatin Velekincë, e cila menaxhohet nga Kompania për Menaxhimin e Deponive në Kosovë (KMDK). Krijimi i këtyre deponive lidhet edhe me mungesën e mundësisë që qytetarët t’i dorëzonin mbeturinat e tyre në këtë deponi në mënyrë të ligjshme, të organizuar dhe të kontrolluar.

Hapja e deponisë sanitare në fshatin Velekincë për pranimin e mbeturinave nga qytetarët nuk duhet të shihet si shqetësim, por si një mundësi për menaxhim më të organizuar dhe më të përgjegjshëm të mbeturinave. Shqetësimet e banorëve duhet të dëgjohen dhe të trajtohen përmes komunikimit institucional, por kjo masë paraqet një hap pozitiv në parandalimin e deponive ilegale dhe mbrojtjen e mjedisit.

Po ashtu, hapja e deponisë sanitare nuk duhet të shihet si kërcënim apo barrë për qytetarët, por si pjesë e një sistemi më të organizuar të menaxhimit të mbeturinave.

Duke pasur parasysh se deponia rajonale në Velekincë nuk i shërben vetëm Komunës së Gjilanit, por edhe njëmbëdhjetë komunave të tjera, përfshirë Ferizajn, Kamenicën, Vitinë, Shtime, Shtërpcën, Kaçanikun, Novobërdën, Parteshin, Kllokotin, Ranillugun dhe Hanin e Elezit.

Sasia e mbeturinave që do të dorëzohet nga qytetarët individualë në këtë deponi është shumë e vogël në krahasim me sasinë totale të mbeturinave që transportohen dhe deponohen nga operatorët për të gjitha komunat që e shfrytëzojnë këtë deponi.

E papranueshme është që t’u lejohet operatorëve të komunave të tjera sjellja dhe deponimi i mbeturinave në këtë deponi, ndërsa qytetarëve të Komunës së Gjilanit t’u mohohet mundësia për t’i dorëzuar mbeturinat e tyre në mënyrë të ligjshme dhe të kontrolluar, siç ka ndodhur më parë.

Prandaj, krijimi i kësaj mundësie për qytetarët e Gjilanit duhet të shihet si një masë parandaluese dhe një kontribut në mbrojtjen e mjedisit. /2LONLINE/