Hapet zyrtarisht Gjykata Administrative

Në kuadër të zhvillimit dhe avancimit të sistemit gjyqësor në Republikën e Kosovës, sot u bë hapja zyrtare e Gjykatës Administrative, si institucion i ri në kuadër të sistemit gjyqësor, me qëllim të rritjes së efikasitetit, sigurimit të qasjes në drejtësi dhe forcimit të sundimit të ligjit në trajtimin e kontesteve administrative.

Në ceremoninë e hapjes morën pjesë përfaqësues të lartë institucionalë, përfshirë ushtruesen e detyrës së Presidentes së Republikës së Kosovës, kryetarin e Gjykatës Supreme të Kosovës, ministren në detyrë të Drejtësisë, anëtarë të Këshillit Gjyqësor, si dhe përfaqësues të partnerëve ndërkombëtarë nga Zyra e Bashkimit Evropian, EULEX-i dhe OSBE-ja. Të pranishëm ishin gjithashtu kryetarë të gjykatave dhe gjyqtarë.

Në fjalët e tyre, folësit theksuan rëndësinë e themelimit të Gjykatës Administrative si një hap i rëndësishëm drejt rritjes së cilësisë së vendimmarrjes dhe përmirësimit të besimit të qytetarëve në institucionet e drejtësisë.

Zëvendëskryesuesja e Këshillit Gjyqësor të Kosovës, Arjeta Sadiku, theksoi se themelimi i Gjykatës Administrative përfaqëson një zhvillim të rëndësishëm në sistemin gjyqësor të Kosovës. Ajo shtoi se kjo gjykatë do të jetë e specializuar në shqyrtimin dhe vendosjen e çështjeve nga konfliktet administrative, përfshirë edhe ato që rrjedhin nga marrëdhëniet e punës, duke ofruar një mekanizëm të pavarur, profesional dhe efikas të kontrollit gjyqësor mbi administratën publike.

Ushtruesja e detyrës së Presidentes së Republikës së Kosovës, Albulena Haxhiu, vuri në dukje se fillimi i punës së Gjykatës Administrative është ditë e rëndësishme për sistemin tonë të drejtësisë dhe përbën një hap të rëndësishëm drejt forcimit të shtetit të së drejtës dhe garantimit të mbrojtjes efektive të të drejtave të qytetarëve. /2LONLINE/