Haliti: Dëshmorët janë themeli i lirisë sonë dhe udhërrëfyes i përhershëm për të ardhmen

Kryetari i Komunës së Vitisë, Sokol Haliti, ka përkujtuar 5 Majin – Ditën e Dëshmorëve – përmes një mesazh urimi në të cilin ka theksuar rëndësinë e sakrificës për lirinë e vendit.

Haliti ka thënë se kjo ditë shënon një moment reflektimi dhe nderimi për të gjithë ata që dhanë jetën për lirinë që gëzohet sot, duke i cilësuar dëshmorët si themel të shtetit dhe udhërrëfyes për të ardhmen.

“Kujtojmë me respekt të veçantë të gjithë dëshmorët e Komunës së Vitisë, të cilët mbeten nderi ynë më i madh,” është shprehur Haliti, duke shtuar se sakrifica e tyre duhet të shërbejë si frymëzim për brezat e rinj.

Në mesazhin e tij, kryetari ka shprehur mirënjohje të veçantë edhe për familjarët e dëshmorëve, duke vlerësuar qëndresën dhe krenarinë e tyre ndër vite.  /2LONLINE/