Gushica me ambulantë të re, donacion i Organizatës “Kuwait Society for Relief”

Banorët e fshatit Gushicë, i janë gëzuar sot projektit të ri që u realizua në fshatin e tyre, që i bënë ata me objekt të ri të ambulantes.

Kjo ambulantë e mjekësisë familjare, është donacion i “Kuwait Society for Relief”.

Kryetari i komunës së Vitisë Sokol Haliti, mes tjerash tha se është ditë e veçantë për banorët e Gushicës, sepse po finalizohet një projekt që ka për qëllim ofrimin e shërbimeve shëndetësore për ta.

“Investime të tilla, janë një mundësi shumë e mirë për zhvillimin e këtyre zonave e fshatrave për rreth që mund ta frekuentojnë këtë objekt për shërbime mjekësore. Andaj, falënderoj këtë shoqatë dhe donatorët e saj që kanë përzgjedhur komunën e Vitisë, për të realizuar një projekt jetik për banorët e kësaj komune në veçanti për qytetarët që do të ju ofrohen shërbime primare shëndetësore në Gushicë”, ka thënë Haliti.

Ai madje ka ndarë mirënjohje për Adil Xherin, drejtor ekzekutiv i Zekat Vous dhe Shaqir Shaqiri drejtor për Kosovë.

Drejtoresha e QKMF-së në Viti, Vjollca Kadolli, ka falënderuar të gjithë ata që u angazhuan nga fillimi i projektit e deri më sot në finalizimin e projektit.

Gjithashtu falënderim i veçantë donatorëve të “Kuwait Society for Relief” me drejtorin e organizatës për Kosovë, Shaqir Shaqirin me bashkëpunëtorë, si dhe gjithë ata që u angazhuan këto tri ditë për të finalizuar punët e mbetura, sidomos ata të vullnetit të mirë.

Ajo theksoi po ashtu se me objektin e ri të ambulantes në Gushicë, do të ofrohen kontrolle mjekësore sipas orarit që do të përcaktohet, ndërkohë që ky projekt nuk do të jetë i fundit sepse po rishikohen nevojat për hapjen edhe të punkteve të tjera nëpër lokalitete ku paraqitet nevoja.

Një falenderim për donatorin dhe Institucionet komunale, e pati edhe kryetari i Këshillit të Fshatit Muhabi Zejnullahu.

Ambulanta në Gushicë, u rindërrua pasi objekti i vjetër ishte djegur, ndërkoh që objekti i ri do të ketë një hapësirë prej 150m2 dhe sipas marrëveshjes për realizimin e projektit i nënshkruar vitin e shkuar, vlera e ndërtimit të këtij objekti shëndetësor ka qenë rreth 94 mijë e 700 euro. /2LONLINE/