Gjykata e Apelit lë në arrest shtëpiak tri gjinekologet e Gjilanit

Gjykata e Apelit e Kosovës i ka lënë në arrest shtëpiak tri gjinekologet M.Sh., H.Z., dhe V.K. duke ia refuzuar si të pabazuar ankesat e prokurorisë dhe avokatëve mbrojtës. Të tria këto dyshohen se nga pakujdesja dhe neglizhenca mjekësore quan në vdekjen e pacientes Arbenita Spahiu, e cila kishte gjakderdhje pas lindjes së foshnjës së saj.
Në njoftimin për media, Gjykata e Apelit thuhet se është lënë në fuqi masën e arrestit shtëpiak prej një muaji, për të pandehurat M.Sh., H.Z., dhe V.K. Në këtë mënyrë kolegji penal i kësaj gjykate, të premten me 01.04.2016, ka refuzuar si të pa bazuara ankesat e prokurorisë dhe avokatëve mbrojtës, kundër aktvendimit të Gjykatës Themelore në Gjilan PPR.KR.50/2016, të datës 24.03.2016.

Të pandehurat M.Sh. dhe H.Z. po dyshohen se kanë kryer veprat penale në bashkëkryerje: Trajtim i pandërgjegjshëm mjekësor nga neni 260, i Kodit Penal të Republikës së Kosovës, dhe mosdhënie e ndihmës mjekësore nga neni 261 i të njëjtit ligj. Ndërsa e pandehura e tretë po dyshohet se ka bashkëvepruar me to në veprën penale mosdhënie e ndihmës mjekësore.

Gjykata e Apelit vlerëson se gjykata e shkallës se parë ka vepruar drejtë kur të pandehurave ua a ka caktuar masën e arrestit shtëpiak, masë kjo që do të siguroj rrjedhë normale të procedurës penale dhe parandalim të përsëritjes se veprës penale.