Gjilani zyrtarizon edhe futbollistin Hamdi Namani

Sport Club Gjilani njofton se ka arritur marrëveshje me FC Prishtina për transferimin me të drejta të plota të futbollistit Hamdi Namani.

Pas një periudhe gjashtëmujore si i huazuar nga klubi kryeqytetas, Namani tashmë bëhet përfundimisht pjesë e familjes kuqe e bardh, duke nënshkruar kontratë që e mban të lidhur me klubin deri në verën e vitit 2028.

“Paraqitjet e tij me fanellën e Gjilanit, profesionalizmi dhe përkushtimi në çdo ndeshje kanë bindur klubin që ta finalizojë transferimin e tij, duke e konsideruar një element të rëndësishëm për projektin dhe objektivat e skuadrës në vitet e ardhshme”, thuhet në njoftim.

Sport Club Gjilani e falënderon FC Prishtinën për bashkëpunimin korrekt në realizimin e këtij transferimi, ndërsa Hamdi Namanit i uron vazhdimësi të sukseseve dhe sa më shumë fitore me fanellën kuqe e bardh.  /2LONLINE/