Gjilani vizitohet nga të rinjtë e komunës së Ferizajt dhe të Lipjanit

/2L ONLINE/ – Nën organizimin e Institutit për Promovimin e Edukimit (IPEDU) dhe në bashkëpunim me Komunën e Gjilanit, Ferizajt dhe Lipjanit po implementohet në këtë trekëndësh të komunave projekti i shkëmbimit të përvojave të të rinjve në fushën e vullnetarizmit.

Në këtë kontekst të rinj nga këto tri komuna po vazhdojnë të kontribuojnë në funksion të krijimit të ligjit për vullnetarizëm, i cili këtë vit pothuajse është përmbyllur.

Mirëseardhje të rinjve nga këto komuna u shprehu Genc Mustafa, udhëheqës i Njësisë së Rinisë së Komunës së Gjilanit, i cili në këtë rast i njoftoi të pranishmit me gjendjen në të cilën është ky sektor, me theks të veçantë tek përparësitë të cilat po krijohen me rastin e krijimit të linjës së veçantë buxhetore të rinisë së Komunës së Gjilanit.

Ndërsa, Ylber Lekaj nga Instituti për Promovimin e Edukimit (IPEDU) shprehu mirënjohjen dhe falënderimin e tij të madh për mikpritjen e treguar nga Komuna e Gjilanit, duke shprehur gatishmërinë që si organizatë të vazhdojë me projekte të përbashkëta sikurse ky i fundit, e që është një bashkëpunim i frytshëm ndërmjet komunave tona. /2L ONLINE/