Gjilani shënoi fitore shumë të rëndësishme, Drita luan nesër një ndeshje po ashtu shumë të rëndësishme

Skuadra e Gjilanit ka shënuar një fitore shumë të rëndësishme, në kuadër të javës së 25-të në Albi Mall Superligën e Kosovës në futboll, duke e mundur Lirinë, me rezultat 3:0. 

Elvedin Heric ( 8′), Marko Roganovic (47′) dhe Edi Basa (86′), shënuan për fitoren e thellë të SC Gjilanit.

Përveç që ishte e rëndësishme për skuadrën gjilanase, që t’i  kthehet fitoreve, edhe rezultati 3 me 0, është i mirëseardhur për përmirësim goldallimi.

Kjo fitore konsiderohet e rëndësishme poashtu për skuadrën e Gjilanit edhe në përpjekjen e saj për t’u ngjitur në tabelë dhe për t’i ikur pozitës së barazhit. Gjilanasit kuq e bardh, aktualisht janë në pozitën e tetë me 25 pikë, tani një pikë më pak se Feronikeli 74, që mban pozitën e shtatë.

E pikërisht me këtë skuadër, nesër ballafaqohet ekipi tjetër gjilanas, Drita, një ballafaqim shumë i rëndësishëm edhe për të, pasi me fitore eventuale, do  t’i afrohej vendit të dytë dhe të parë, me vetëm 1 pikë, përkatësisht 2 pikë, pasi pikërisht këto dy skuadra, Ballkani, lideri dhe Llapi i dyti, sot kanë pësuar humbje dhe kanë ngelur në kuotat e 51 dhe 50 pikëve, derisa Drita ka aktualisht 46 pikë.

Pra sot në kuadër të javës së 25-të janë zhvilluar këto takime dhe arritur këto rezultate:

Gjilani  – Liria   3:0
Fushë Kosova  – Ballkani  2:0
Malisheva  – Llapi  2:1.

Nesër luhen:

Feronikeli 74 – Drita
Prishtina – Dukagjini