Gjilani i sigurt: Asnjë vdekje që lidhet me krimin

/2L ONLINE/ – Në dy vjetorin e marrjes së pushteti në Gjilan, LDK-ja dhe partnerët e saj i vlerësojnë si dy vite të një qeverisje të mirë me Gjilanin. Ndërsa, kreu i komunës së Gjilanit Lutfi Haziri ka vlerësuar faktin që Gjilani është një qytet i sigurt.

Haziri është shprehur i lumtur që në këto dy vite Gjilani është identifikuar si qytet i sigurt ku brenda kësaj periudhe nuk ka pas asnjë vdekje si pasojë e akteve kriminale duke bërë që Gjilani të shquhet ndër komunat e Kosovës për siguri publike dhe që ofron një ambient të qetë për të gjithë qytetarët pa dallim.

Përndryshe, Haziri sot ka mbajtur takimin e Bordit të Drejtorëve, e hapur për publikun dhe mediat, duke përfshirë edhe transmetimin e drejtpërdrejtë në dy stacione lokale (Radio Star e Radio Victoria), si dëshmi e transparencës dhe se ka vlerësuar punën që është bërë për këto dy vite prej se morën Gjilanin për ta qeverisë, pas rezultatit që prodhuan zgjedhjet e fundit.

Ai e vlerësoi punën e drejtorive duke vënë në theks edhe zbatimin e dietës buxhetore që e kishte praktikuar për këto dy vite. Haziri tha se Gjilani i ka pasur dy vite të rënda, në aspektin buxhetor dhe i vije mirë që është respektuar dieta duke bërë që Gjilani të jetë shembull i kursimit të buxhetit dhe i kontrollit në shpenzime, që ka mundësuar pastaj edhe shlyerjen e obligimeve dhe borxheve të këqija të trashëguara nga qeverisja e kaluar.

Po ashtu Haziri ka thënë se Gjilani është komunë që punon me kalendarin e aktiviteteve , ka përmendur projektet e realizuara dhe ato që priten të ndodhin në vitin 2016 duke i falënderuar me këtë rast edhe të gjithë donatorët dhe mbështetësitë të tjerë në këtë drejtim. Më pas ai ka kërkuar të raportojnë secili drejtor prezentë në këtë takim, e të cilët kanë prezantuar punën e tyre njëvjeçare, të arriturat, sfidat dhe synimet për 2016. /2L ONLINE/