Gjilani fiton, Drita barazon

Java e 18-të, e fundit e stinorit, në Superligën e Kosovës në futboll, solli të dielën tri ballafaqime, në mesi ne tyre edhe të skuadrave gjilanase, FC Drita dhe SC Gjilani, që bëjnë gara në elitën e futbollit kosovar. Kampionia në fuqi, Drita ka barazuar me Malishevën 1 me 1, e Gjilani ka shënuar fitore të vlefshme, 3:2,  për ta përmbyllur stinorin në mënyrën më të mirë.

Kur jemi te Drita, skuadra  bardh e kaltër ishte mysafire te Malisheva. Drita avancoi e para përmes Jorgo Pëllumbit, në minutën e 83-të, por kjo epërsi, ndonëse kah fundi i ndeshjes, nuk u mbajt, pasi vendësit shënuan në minutën e 89 përmes Xhemajl Ibishit, për tu barazuar rezultati, që ishte edhe epilog i këtij takimi.

Drita, aktualisht është e pesta në tabelë me 26 pikë, por kujtojmë se ka një takim më pak të zhvilluar, atë me Prishtinën.

Ndërsa, kur jemi te skuadra tjetër gjilanase, SC Gjilani mundi Prishtinën e Re me rezultat 3 me 2.

Ishte futbollisti i Gjilanit, Edi Basa që ka shënuar në minutat, 23 dhe 28, si dhe në minutën e 36 shënoi edhe Senad Jaroviq, deri sa për mysafirët shënuan, Gomes në fund të pjesës së parë dhe krejt në fund të takimit edhe Berisha, për rezultatin 3:2, epilog i këtij takimi.

Gjilani përmbyll stinorin me 26 pikë në pozitën e gjashtë.  /2LONLINE/