Gjilani e pëson nga Vushtrria

SC Gjilani, një pretendent në këtë edicion për tri pozitat e para, së paku ashtu është deklaruar strategu i tyre, kryetrajneri Debatik Curri, e ka pësuar sot nga Vushtrria, skuadra e fundit në tabelë.

Për më tepër, Vushtrria deri më sot i kishte radhitur vetëm humbjet, por ja që sot e gjeti skuadrën gjilanase, që ia mundësoi fitoren e parë dhe gëzimin për tri pikët e para, ndërkohë që shija e hidhur iu mbeti “kuq e bardhëve”

Në ballafaqimin e javës së tetë të Albi Mall Superligën e Kosovës në futboll, Vushtrria – Gjilani 1:0, me golin e shënuar nga Urim Statovci në minutën e 60-të të takimit.

Kështu, Gjilani ia hap derën sërish krizës, pasi në tri ndeshjet e fundit nuk ka fitore, por se tani i ka tri ndeshje radhazi si vendës, një sprovë e mirë, për të parë a është vërtetë Gjilani për kreun e tabelës, apo për t’u luhatur, poshtë e lartë, lartë e poshtë, për të përfunduar pastaj  jo me synimet e planifikuara.

Gjithsesi, e mira e gjithë kësaj është se kanë kaluar vetëm tetë javë dhe për objektivat që i ka vënë vetës skuadra e Gjilanit ka kohë sa të duash, nëse i kthehet, lojës së duhur dhe fitoreve si dhe i eliminon luhatjet.

Strategut Debatik Currit, i mbetet që humorit të tij ironik, për kontratë “dhjetëvjeçare” me Gjilanin, t’ia shtoi edhe pjesën e dytë, që valixhen e kompletuar e ka hazër, lënë pas dere.

Përndryshe, nga këto tetë javë, Gjilani ka grumbulluar 11 pikë dhe aktualisht ndodhet në pozitën e gjashtë.  /2LONLINE/