Gjilani e gjen vetën e tij, shënon fitore bindëse ndaj Suharekës

Pas rezultateve jo të mira e të pritura, tani e disa javë, skuadra e Gjilanit duket se e gjeti vetën e saj, edhe atë në një moment tejet të rëndësishëm, për ta përcaktuar ecurinë e pjesës së fundit të kampionatit, se a do të jetë pjesë e objektivit për të dal në garat evropiane, apo të luftojë për mbijetesë në elitën e futbollit kosovar.

Fitorja bindëse ndaj Suharekës me rezultat 3:0, e ktheu ekipin kuq e bardh, që po drejtohet nga Ardian Nuhiu, në pozitën e katërt dhe ia riktheu sërish shpresën për mundësinë e daljes në Evropë, pasi për momentin skuadra pozicionohet e katërta me 42 pikë, 5 më pak se pozita e tretë, në të cilën ndodhet Malisheva, me të cilën, skuadrën gjilanase e pret ballafaqimi, në javën e 33-të, edhe atë e gostitë në shtëpi, transmeton 2LONLINE.com.

E, Gjilanit, krahas me Malishevën, i kanë mbetur lojë edhe me Feronikelin, Prishtinën, Dritën e Ferizajn, lojë këto tejet të rëndësishme për ta përcaktuar në fund pozicionin, që mund ta dërgojë në garat evropiane.

Përndryshe, kur jemi te ndeshja e sotme, që ishte e javës së 31-të, e Superligës së Kosovës, në Futboll,  Gjilani mundi Suharekën me rezultat 3:0, me  dy golat e Senad Jarovicit (50’ dhe 77’) dhe të Blerind Morinës (59’).  /2LONLINE/