Gjilani duhet ta ketë të konservuar Burgun – Muze
Nga: Shefik Surdulli – / ish-anëtar i Kuvendit Komunal në Gjilan, në mandatin qeverisës (2017/2021) kur është marrë vendimi/
REAGIM PUBLIK
Deklaratat e Kryeministrit në detyrë, z.Albin Kurti dhe të kryetarit të Komunës së Gjilanit, z. Alban Hyseni, me rastin e përurimit të fillimit të punimeve për «Bulevardin e Qytetit», dje në Gjilan, se, krahas rrënimit të objektit të ish gjykatës, ku tani është zyra e kryetarit të Komunës, Kuvendi Komunal, dhe një pjesë e administratës komunale, do ta rrënojnë tërësisht edhe kompleksin e burgut të qytetit, në vend të të cilavë do të ngritet objekti i ri i Adminstratës Komunale, ngreh dilema, paqartësi dhe shqetësim për kategorinë e ish të borgosurve politikë, ndaj të cilëve, kryetari i Komunës z.Alban Hyseni, duhet të jetë transparent dhe te sqarohet për publikun:
1. A do ta zbatojë vendimin e Komunës së Gjilanit, me nr.prot. 016-70153, të dat. 30.06.2021, pika 2 e këtij vendimi, për inkorporimin e një pjese të burgut të konzervuar në muze, në kuadër të projektit për ndërtimin e Administratës Komunale në të njejtën hapësirë, sipas kërkesës së Shoqates së të Burgosurve Politik në Gjilan,
2. Nëse jo, cila është arësyeja të injorohet kërkesa e të burgosurve politikë shqiptarë për realizimin e kësaj kërkese simbolike, dhe të arësyeshme, kujtoj unë?
Si anëtar i Kuvendit Komunal në Gjilan, në atë mandat qeverisës (2017/2021), Komuna e Gjilanit, fill pas këtij vendimi, i ka dhënë detyrë projektuese një kompanie gjilanase, për projektin e Administratës Komunale, brenda të cilit është inkorporuar edhe një pjesë e burgut famkeq, të konzervuar si muze, si dëshmi për brezat e ardhshëm, për sakrificën e të burgosurve politikë shqiptar për lirinë e Kosovës.
Në vijim, për korrektësi ndaj publikut dhe Shoqatës së Të burgosurve Politik Shqiptar, Dega në Gjilan, për rikujtesë, po e risjellë një shkrim timin, të asaj periudhe, në kuadër të kërkesës për realizimin e kërkesës së SHBP dega në Gjilan, që e kam ngritur lidhur me këtë çështje, në seancën e KK-së më 25 mars 2021.
***
Gjilani do të ketë të konzervuar BURGUN – MUZE si dëshmi te brezat e ri, për sakrificën e djalërisë shqiptare për lirinë e Kosovës
Gjilan, 25 mars / Nisma e mëhershme e Shoqates së të Burgosurve Politik në Gjilan, që burgu famkeq serb i kësaj komune, të konzervohet në BURG MUZE, për të mbetur të paktën një dëshmi e kohës për brezat e ardhshëm, se për lirinë e Kosovës, djalëria shqiptare atdhedashëse e Gjilanit dhe e gjithë Kosovës, sakrifikoi edhe përtej imagjinatës së sotme, ishte preokupim edhe imi në seancën e sotme të Kuvendit Komunal në Gjilan.
Në pyetjen time, për kryetarin e Komunës, z. Lutfi Haziri, për rrjedhën e kësaj nisme (i cili atëherë e kishte mirëpritur këtë iniciativë), mora përgjigjen nga nënkryetari i komunës dhe nga drejtori i Urbanizmit, se: një pjesë e këtij burgu, sipas kërkesës së Shoqatës së të Burgosurve Politike të Komunës së Gjilanit, është inkorporuar si BURG MUZE në projektin ideor të Administratës Komunale, e cila do të ngritet mu në atë hapësirë, ku sot është kompleksi i burgut në Gjilan.
Shënim:
I sugjeroj përfaqësuesëve të SHBP-së në Gjilan, që për më shumë detaje rreth këtij projekti të interesohen përmes Drejtorisë Komunale të Urbanizmit.
Shefik Surdulli /këshilltar komunal, nga PDK Gjilan/