Gjilani dhe Presheva synojnë projekte të përbashkëta

Kryetari i Komunës së Gjilanit, Alban Hyseni, ka vizituar Preshevën, ku është takuar me kryetaren e kësaj komune, Ardita Sinani, me të cilën ka diskutuar për mundësitë e forcimit të bashkëpunimit ndërmjet dy komunave.

Gjatë takimit, sipas Hysenit, vëmendje e veçantë iu kushtua realizimit të projekteve të përbashkëta, koordinimit institucional dhe shkëmbimit të përvojave, me synim zhvillimin e dy komunave dhe përmirësimin e jetës së qytetarëve.

Hyseni ka theksuar se Gjilani dhe Presheva i lidhin jo vetëm afërsia gjeografike, por edhe vlerat, historia dhe synimet e përbashkëta.

“Gjilani ka qenë dhe do të mbetet gjithmonë pranë Preshevës”, ka deklaruar Hyseni, duke e uruar njëkohësisht kryetaren Ardita Sinani për rezultatin e zgjedhjeve të fundit dhe duke i dëshiruar suksese në angazhimin e saj në shërbim të qytetarëve të Preshevës dhe shqiptarëve të Luginës.

Kryetari Hyseni e ka falënderuar Sinanin për mikpritjen dhe gatishmërinë për ta konkretizuar bashkëpunimin ndërmjet dy komunave përmes projekteve dhe rezultateve në interes të qytetarëve.  /2LONLINE/