Gjilani dhe Kamenica thellojnë bashkëpunimin në fushën e arsimit

Në Gjilan është mbajtur një takim ndërmjet drejtuesve të arsimit nga dy komunat fqinje, me fokus forcimin e bashkëpunimit dhe rritjen e cilësisë së shërbimeve arsimore. Drejtori i Drejtorisë Komunale të Arsimit në Gjilan, Jeton Rexhepi, priti homologun e tij nga Kamenica, Selami Klaiqi, në një takim ku morën pjesë edhe përfaqësues të stafeve përkatëse.

Gjatë diskutimeve u trajtuan tema me interes të përbashkët, me theks të veçantë në shkëmbimin e praktikave dhe përvojave më të mira në arsim. Palët u pajtuan se koordinimi ndërkomunal është thelbësor për avancimin e sistemit arsimor dhe për përmbushjen e standardeve të kërkuara, transmeton 2LONLINE.

Duke folur për rëndësinë e këtij bashkëpunimi, Rexhepi theksoi se “bashkëpunimi ndërmjet dy komunave fqinje në fushën e arsimit, me qëllim ofrimin e shërbimeve cilësore, është detyrim institucional dhe mbetet prioritet i përbashkët i të dy drejtorive, përkatësisht komunave tona.”

Ai shtoi se Drejtoria Komunale e Arsimit në Gjilan, në rolin e saj si qendër rajonale, do të vazhdojë të intensifikojë bashkëpunimin edhe me komunat e tjera të rajonit. Në këtë drejtim, sipas tij, në periudhën në vijim pritet organizimi i tryezave të përbashkëta të diskutimit për çështje me interes të përbashkët, me theks të veçantë në arsimin e mesëm të lartë.  /2LONLINE/