Gjilan: U mbajt sesioni informues për programin “Punë dhe Aftësi për Parandalimin e Migrimit në Kosovë”

Sot, Drejtoria për Zhvillim Ekonomik, në Komunën e Gjilanit, në bashkëpunim me organizatën gjermane Help, mbajti sesionin informues për programin “Punë dhe Aftësi për Parandalimin e Migrimit në Kosovë”, i mbështetur nga Qeveria Gjermane.

“Falënderoj të gjithë qytetarët, përfaqësuesit e bizneseve dhe të interesuarit që morën pjesë dhe u informuan nga afër për mundësitë që ofron ky program për themelimin dhe zhvillimin e bizneseve, përmes granteve në pajisje, trajnimeve, mentorimit dhe këshillimit”, ka theksuar Haki Huruglica, drejtor i Drejtorisë për Zhvillim Ekonomik, në Komunën e Gjilani.

Ai u ka uruar shumë suksese për të gjithë aplikuesit me shpresën që kjo mundësi të sjellë sa më shumë biznese të reja, vende pune dhe perspektivë për qytetarët tanë.

“Dua të theksoj se të gjitha procedurat e aplikimit dhe përzgjedhjes do të zhvillohen nga organizata Help, ndërsa i gjithë procesi do të jetë transparent dhe në përputhje me kriteret e përcaktuara të programit. Ftoj edhe mediat e interesuara që të përcjellin dhe të kontribuojnë në informimin e drejtë të publikut gjatë gjithë këtij procesi”, ka thënë drejtori Haki Huruglica.  /2LONLINE/