Gjilan: Mbahet mbledhja e KKSB-së për të adresuar situatën e sigurisë pas ngjarjeve të fundit tragjike

“Sot kemi mbajtur mbledhjen urgjente të Këshillit Komunal për Siguri në Bashkësi për të adresuar situatën e sigurisë pas ngjarjeve të fundit tragjike.  Në këtë takim, ku mori pjesë edhe zëvendësministri i Punëve të Brendshme, Enver Dugolli, u njoftuam nga afër me detajet e rasteve përmes drejtorit rajonal dhe komandantit të stacionit të policisë”, ka thënë Alban hyseni, kryetar i Komunës së Gjilanit.

Ai bëri me dije se gjatë mbledhjes kërkoi zyrtarisht rritjen e kontrolleve policore për armëmbajtje pa leje dhe shtimin e prezencës së policisë në shkolla për të garantuar sigurinë e fëmijëve tanë.

“Si institucione komunale kemi ofruar bashkëpunim të plotë e të pakursyer me organet e rendit, ndërsa secili përfaqësues institucional mori për obligim një angazhim të shtuar për të parandaluar ngjarje të tilla në komunën tonë”, ka thënë i pari i Gjilanit.

Kryetari Hyseni tha se mbrojtja e jetës së qytetarëve tanë mbetet prioriteti kryesor dhe do të punojnë me vendosmëri për të garantuar qetësinë dhe rendin publik në çdo pjesë të Gjilanit. /2LONLINE/