Gjilan: Dogana dhe Policia parandalojnë një rast të kontrabandës me mallra

Dogana e Kosovës, në bashkëpunim me Policinë e Kosovës, ka parandaluar një rast të kontrabandimit me mallra në kuadër të aktiviteteve operative për luftimin e kontrabandës.

Njësia e Task Forcës – Jug, gjatë veprimtarisë së saj operative, ka identifikuar një automjet të dyshuar për bartjen e mallrave të kontrabanduara, i cili ishte vërejtur duke hyrë ilegalisht nga territori i Serbisë në Republikën e Kosovës.

Pas ndalimit dhe kontrollit të automjetit, janë gjetur mallra për të cilat nuk janë paraqitur dokumentet përkatëse që dëshmojnë prejardhjen dhe importin e tyre të ligjshëm.

Automjeti, së bashku me mallrat e gjetura, është sekuestruar nga Dogana e Kosovës, ndërsa rasti do të trajtohet në përputhje me procedurat ligjore dhe administrative në fuqi.

Dogana e Kosovës, në bashkëpunim të ngushtë me Policinë e Kosovës dhe institucionet e tjera përgjegjëse, mbetet e përkushtuar në parandalimin dhe luftimin e kontrabandës, mbrojtjen e interesave ekonomike të vendit dhe zbatimin e ligjit, thuhet në fund të njoftimit të Doganës.  /2LONLINE/