Gjilan: Aktivitet sensibilizues për Ditën Botërore të Sindromës Down, mesazhe për gjithëpërfshirje dhe barazi

Në Gjilan, në kuadër të shënimit të Dita Botërore e Sindromës Down, Kryqi i Kuq i Kosovës – dega në Gjilan ka organizuar një aktivitet sensibilizues në bashkëpunim me Qendrën e Kujdesit Ditor “Pema” dhe Policinë e Komunitetit.

Aktiviteti u karakterizua nga një atmosferë e ngrohtë dhe përfshirëse, duke sjellë momente gëzimi për pjesëmarrësit dhe duke përcjellë mesazhe të fuqishme për pranimin, barazinë dhe respektin ndaj personave me sindromën Down.

Organizatorët theksuan rëndësinë e ndërgjegjësimit të shoqërisë për gjithëpërfshirjen dhe mbështetjen e kësaj kategorie, duke nënvizuar se aktivitete të tilla kontribuojnë në ndërtimin e një komuniteti më solidar dhe më të drejtë.

Në këtë aktivitet morën pjesë edhe aktorët e Teatrit të Gjilanit, të cilët me performancën e tyre e bënë ngjarjen më atraktive dhe të paharrueshme për të gjithë të pranishmit.

Organizatorët shprehën mirënjohje të veçantë për donatorët Durresi Shpk, Luli 93 dhe Dj Tafa për mbështetjen e dhënë, si dhe falënderuan institucionet arsimore dhe shëndetësore për kontributin e tyre, përfshirë Qendrën “Don Bosko”, shkollat fillore “Zija Shemsiu” dhe “Mulla Idrisi”, si dhe Institutin Kombëtar të Shëndetit Publik.

Ky aktivitet u mbyll me mesazhin se vetëm përmes bashkëpunimit dhe solidaritetit mund të ndërtohet një shoqëri më e drejtë, me më shumë dashuri, mirëkuptim dhe gjithëpërfshirje për të gjithë.  /2LONLINE/