Gjenerallejtënant Rrahman Rama përcolli trajnimin me autoblinda në kazermën e FSK-së, në Gjilan

Komandanti i Forcës së Sigurisë së Kosovës(FSK), gjenerallejtënant Rrahman Rama së bashku me komandantin e Brigadës pë Reagim të Shpejtë(RSH), kolonel Xhevahir Gecin dhe me bashkëpunëtorët e tij, e vizitoi Batalionin e Parë për Reagim të Shpejtë të BRSH-së, në Gjilan ku u njoftua për aktivitetet e përgjithshme të Batalionit të Parë nga komandanti i saj, nënkoloneli Haki Xhemajli.

Vizita e komandantit të FSK-së, gjeneral Ramës dhe stafit të tij, në Gjilan, ka qenë e fokusuar në përcjelljen e trajnimit “Shofer, mirëmbajtje dhe lëvizje taktike me autoblinda”, që është duke u realizuar me ekipet mobile turke dhe në mbeshtetje edhe nga instruktorët e BRSH-së.

Me këtë rast, komandanti i FSK-së, gjeneral Rama ka falënderuar ekipet mobile turke, për bashkëpunimin që po na ofrojnë, në ngritjen profesionale të FSK-së, si dhe pjesëtarët e BRSH-së, për angazhimin e tyre, në realizimin e këtij trajnimi.

Më pastaj, komandanti i FSK-së, gjeneral Rama, përcolli nga afër operacionet taktike me autoblinda si dhe demonstrimet dhe operimet e ndryshme të pjesëtarëve të këtij Batalioni. Ky trajnim, po zhvillohet me shumë sukses.

Ndërsa, komandanti i BRSH-së, koloneli xhevahir Geci, para komandantit të FSK-së, gjenerallejtënant Rrahman Ramës shpalosi planet e avancimit të kapaciteteve të BRSH-së, dhe pavarësimit të kapaciteteve për operim me autoblinda

Kurse, majori Bede, përgjegjës i ekipit mobile turke, e informoi komandantin e FSK-së, për ecurinë e trajnimit me autoblinda të realizuar në Brigadën për Reagim të Shpejtë, në Istog, dhe në Batalionin e Parë të BRSH-së, në Gjilan.

Në fund, majori Bede falënderoi Komandantin e FSK-së, dhe stafin e tij, për mbështetjen në realizimin e këtij trajnimi shumë të rëndësishëm për FSK-në.