Gjenerallejtënant Rrahman Rama, ligjërate rreth transformimit të FSK-së në FAK

Komandanti i Forcës së Sigurisë së Kosovës Gjenerallejtënant Rrahman Rama, para një grupi të profesorëve dhe studentëve të Kolegjit Evropian “Juridica”, mbajti ligjëratën me temën “Transformimi i Forcës së Sigurisë së Kosovës në Forca të Armatosura të Kosovës”. Ligjëratën e hapi dekani i Kolegjit Evropian “Juridica ” Prof. As. Dr. Agron Beka duke falënderuar për bashkëpunimin e mirë që ka me FSK-në.

Komandanti i FSK-së Rrahman Rama, ligjëratën e ka vazhduar duke shtjelluar strukturën e MFSK-së dhe FSK-së, Kapacitetet Operacionale, Vendbanimet, Aktivitetet humanitare si dhe trajnimet të cilat janë duke u mbajtur brenda dhe jashtë vendit, duke filluar nga SHBA-ja me bashkëpunimin bilateral me Gardën Kombëtare të shtetit IOWA të SHBA-së, pjesëmarrjen e pjesëtarëve të FSK-së në trajnimet dhe shkollat e NATO-s. Gjatë ligjëratës Komandanti theksoi edhe suksesin që pjesëtarët tregojnë gjatë studimeve jashtë vendit, duke treguar shembullin e nëntogerit të FSK-së, që ka përfunduar trajnimin në SANDHURST të Mbretërisë së Bashkuar duke u dekoruar si kadeti më i mirë. Me këtë rast ai veçoi edhe punën që bëjnë ekipet e deminerëve të FSK-së, duke çminuar me mijëra metra katror në vit në vende të minuara, dhe pa pasur as më të voglin incident me çka tregohet puna, përkushtimi dhe profesionalizmi që kanë pjesëtarët e FSK-së.

Me këtë rast Gjeneral Rama një pjesë të ligjëratës e përqendroi në përgatitjet të cilat janë bërë për transformimin e FSK-së në Forca të Armatosura të Kosovës, pas rishikimit të Sektorit Strategjik të Sigurisë (RSSS) dhe analizës që i është bërë gjithë sektorit të sigurisë, për t`i analizuar sfidat e sigurisë të tashmes dhe të së ardhmes, si rreziqet e brendshme ashtu edhe ato të jashtme. Mbi bazën e rekomandimeve të këtij rishikimi është planifikuar krijimi i Forcave të Armatosura, ku do ketë mision të ri: mbrojtja e sovranitetit dhe integritetit territorial të vendit; mbështetje e autoriteteve civile; mbështetje e komuniteteve; pjesëmarrja në operacione paqeruajtëse ndërkombëtare. Mbi bazën e këtyre detyrave thelbësore është punuar dhe planifikuar edhe struktura e Forcave të Armatosura të Kosovës.

Pas përfundimit të ligjëratës të pranishmit parashtruan pyetje të ndryshme rreth: bashkëpunimit bilateral, strukturës gjinore, pajisjeve, misionit dhe detyrave të Forcave të Armatosura.