Gjashtë vite pa Dr. Feti Hetemin, Fondacioni që mban emrin e tij ndan tri bursa për studentët e mjekësisë

Në gjashtëvjetorin e ndarjes nga jeta të mjekut dhe humanistit të njohur, Dr. Feti Hetemi, Fondacioni që mban emrin e tij ka ndarë tri bursa për studentë të mjekësisë nga rajoni i Anamoravës.

Përfitues të bursave këtë vit janë Shkëlqim Halili, Agnesa Shabani dhe Drilona Jerliu, të cilët do të mbështeten me nga 500 euro secili.

Përzgjedhja e bursistëve është bërë pas shqyrtimit të aplikimeve të pranuara në kuadër të thirrjes publike për studentët e mjekësisë. Komisioni vlerësues i Fondacionit përbëhej nga Dr. Shelqesa Halili, Dr. Ardi Ademi dhe Dr. Valdrin Hetemi.

Kjo është hera e pestë që Fondacioni “Dr. Feti Hetemi” ndan bursa për studentët e programit të Mjekësisë që vijnë nga rajoni i Anamoravës, duke vazhduar kështu misionin për mbështetjen dhe përgatitjen e kuadrove të reja në shëndetësi.

Dr. Feti Hetemi, mjek i njohur nga Vitia, u nda nga jeta më 19 gusht 2020, si pasojë e COVID-19. Përveç profesionalizmit të dëshmuar në fushën e internos dhe nefrologjisë, ai kujtohet edhe për humanizmin, angazhimin shoqëror dhe kontributin e tij në shërbim të qytetarëve dhe të drejtave të popullit shqiptar.

Gjatë viteve ’90, Dr. Hetemi ishte ndër themeluesit dhe drejtuesit e Shoqatës Humanitare “Nëna Terezë” në Viti, përmes së cilës u mundësua funksionalizimi i ambulancave në disa fshatra të komunës, në një periudhë të vështirë për sistemin shëndetësor të Kosovës.

Kontributi i tij në shëndetësi kishte nisur edhe më herët. Në vitet ’80, në cilësinë e delegatit të Kuvendit të Kosovës, Dr. Hetemi ishte ndër iniciatorët kryesorë për themelimin e Repartit të Hemodializës në Spitalin e Gjilanit.

Ai dha kontribut të rëndësishëm edhe gjatë luftës së UÇK-së, duke ndihmuar në trajtimin dhe përkujdesjen ndaj ushtarëve të plagosur.

Për veprimtarinë profesionale, humane dhe kombëtare, Dr. Feti Hetemi është dekoruar post-mortem nga Presidentja e Republikës së Kosovës, Vjosa Osmani, si dhe nga kryetari i komunës së Vitisë, Sokol Haliti.

Familja Hetemi, përmes Fondacionit të themeluar në kujtim të tij, vazhdon çdo vit të mbështesë studentët e mjekësisë, duke synuar që trashëgimia e Dr. Feti Hetemit të vazhdojë përmes brezave të rinj të profesionistëve shëndetësorë – profesion të cilit ai i kushtoi jetën dhe i shërbeu me përkushtim e vetëmohim.

BURIMI: info-plus.tv