GIZ-i me projekt për forcimin e aftësisë konkurruese

/2L ONLINE/ – Përfaqësues të Organizatës GIZ, kanë zhvilluar një takim me udhëheqjen dhe zyrtarët komunal të Vitisë, ku kanë prezantuar projektin që synon të rrisë zhvillimin ekonomik në zonat rurale. Veronika Hofinger dhe Mrika Maliqi përfaqësuese nga GIZ, duke njoftuar për projektin kanë thënë se projekti “Konkurrentshmëria e Sektorit Privat në zonat rurale në Kosovë (COSiRA)”, synon forcimin e aftësisë konkurruese në rajonet e përzgjedhura rurale dhe sektorët e bizneseve.

“Me anë të një marketing rajonal dhe brendingut, synohet ngritja e kapaciteteve të institucioneve publike dhe private në proceset e planifikimit dhe zbatimit të iniciativave rajonale. Veçanërisht ajo do të promovojë konkurrueshmërinë e zonave rurale të përzgjedhura përmes bashkëpunimit rajonal dhe ndër-rajonal në mes komunave, sektorit privat dhe hisedarëve të ndryshëm për përparësitë apo nevojat e identifikuara në rajon”, ka theksuar Maliqi. Ajo po ashtu ka njoftuar për trajnimin që do të mbahet gjatë këtij muaji me përfaqësues të rajonit të Gjilanit dhe rajonit të Drinit.

Ndërsa zv. kryetari i komunës së Vitisë Hasan Aliu, duke falënderuar përfaqësuesit e GIZ-it për punën dhe përkushtimin për komunën e Vitisë, ka thënë se institucionet komunale mbështesin nismat e tilla dhe se edhe Vitia do të jetë pjesë përbërëse e këtij projekti. Projektet e tilla siç është ky trajnim i paraparë, kanë për qëllim rritjen dhe efikasitetin e punës, e kjo luan rol shumë të madh dhe pozitiv në zhvillimin e ekonomik, zbutjen e papunësisë dhe shumë përparësive të tjera”, ka thënë Aliu.

Projekti I GIZ-it do të fokusohet në tri pilot rajone siç janë: rajoni i Sharrit, Anamoravës dhe rajonin e Drinit, që janë të njohura për bujqësi dhe zona etnikisht të përziera./2L ONLINE/